Aizawl 5th June, 2024 (Wed):  Vawiin khan Horticulture Minister Prof. Lalnilawma chuan ZAGCS (Zo Anthurium Growers Cooperative Society Ltd.) Collection Centre, Ramhlun North a mi a tlawh.

Horticulture Minister Prof. Lalnilawma chuan thu sawiin, "Horticulture Department-in ZAGCS-te Anthurium hlawhtling taka chin leh market a nih theihna tura hma a lakpuina-ah lawmawm ka ti hle a, an thawnchhuah tur sawngbawlna hmun a tak ngeia ka hmuh atanga ZAGCS te'n hma an lak nasatzia leh Anthurium hmanga Mizoram an tihhmingthatna-ah lawmthu ka sawi a. ZAGCS te'n an harsatna tawh neuh neuh an rawn thlen-ah  a theih ang anga hmalakpui an ni ang a, Anthurium chu Mizo te’n tourism kan promote-na pakhat pawimawh tak a nih avangin Anthurium festival neih zel theih nise tih ZAGCS hruaitute rawtna pawh hmalakpui mek a ni," a ti.

Anthurium hi Mizoram tualto nilo mahse, Mizorama thar hi a quality duhthusam a nih avang te, a vase life a that em avang leh Mizoram atanga kartin thawnchhuah awm chhun a nih avang hian hei aia zau zawk leh uar lehzuala hmalakna tlak a nih thu te  he hunah hian sawiho a ni.

Minister hi ZAGCS managing board member te'n lo dawngsawngin minister-in an hmun meuh a tlawh avangin lawmthu an sawi a. Hetiang taka kut hnathawktute tuipui leh chawisang duhtu Horticulture Department-in a chang chu lawmawm an tih thu an sawi.

ZAGCS hruaitute hnen atangin kum 2001-ah member 24-in Horticulture Department puihna-a Mizoram-ah Anthurium chin tan a nih thu leh Society ZAGCS hi kum 2016-a an din thu te, tunah member 150 lai heng District Lunglei, Serchhip, Kolasib leh Aizawl-ah an awm mek thu te report a ni a. Anthurium hi Mizoram-ah a that duh em avang leh India ram hmun danga an neih ve loh anih avang hian a market-ah buaina a awm lova, kartin Rs. 40,000 man bawr vel Delhi, Phul Mandi-ah an thawn chhuah ziah bakah local market-ah tam tham tak an hralh chhuah thu he hunah hian ngaihthlak a ni bawk.